السلام عليكم
إخواني قصيدة بقلمي تحت عنوان
رجعو أفراحي
نتمنا تعجبكم
من مرار الفراق شربت كيسان طال علي العذاب حتى رشاني
صبرت للكية و ساعفت الزمان رضيت و قلت هذا ربي ما عطاني
لقيت الورقة خير من فلان و فلان و كانت صح هي شريكة زماني
كتبت على حكاية الهم و المحان و صورت في قصايد واش بكاني
كل ما نتفكر حجرة المرجان نكتب و الدمعة تسيل من عياني
بقيت ضايع و حالي مشيان ما دريت حب العذرا باش شراني
يا وعدي كل يوم هايم سكران ماشي بالخمر الحمد لله ربي ما بلاني
سكران بالهوى على حبي لهفان حتى خبر يفرح قلبي ما جاني
ما جهلت ما غرني الشيطان قلت نروح ندير وحدة تهواني
حوست و مكا درتش في الحسبان المكتوب في ولاية بعيدة رماني
قلت بالك يرزقني ربي بالنسيان نبدا حياة جديدة و نونس زماني
يا حسراه على جايحة النسوان كرهتلي حياتي و زادت محاني
بعدها تعرفت على حجرة الويدان كيفاش عرفتها تقول ربي عماني
بعدها تيقنت بانلي مليح البرهان بلي حب غزالتي سكني دخلاني
ريحت عاقل و أني مريض و غضبان و محبوبتي تحرقلي قلبي عيناني
قلت المهم قلبها راه سالي و فرحان و أنت بحر عليك يا وليد عثماني
لكن بعثلي ربي وحد الإنسان بعثو باش يهنيني و يطفيلي نيراني
لثم بقى عقلي دايخ و دهشان ما أمنتش بلي هو اللي قصدني و جاني
ما حوستش نفهم شكون الغلطان المهم يفناو و يخلاصو عدياني
كتب و قدر ربي نودع الأحزان و حتى عدويا ننساه و ينساني
ذاك الإنسان صلح واش فسد الزمان و رجع ذيك الودرة الباهية لجناني
غزالتي معايا عايشين في لامان و غير معاها اللي يتحقو الأماني
صبح و عشية ندعي ربنا الرحمن تدوم المحبة بيني و بين نور عياني
الأحد أبريل 03, 2011 3:39 pm